ស្គាល់គេបាន៦ខែ គេវិលទៅរកសង្សារគេវិញ!

យុវជនម្នាក់ត្រូវបានយុវតីស្រស់សោភាសុំបែក បន្ទាប់ពីស្គាល់គ្នាបាន៦ខែ។ ម៉េចបានជាអ្នកទាំងពីរឆាប់បែកគ្នាម្ល៉េះ?

យុវជន ដែលមានវ័យ២៣ឆ្នាំ ឈ្មោះណាន់ ជាបុគ្គលិកនៅក្រុមហ៊ុនមួយក្នុងរាជធានីភ្នំពេញបានរៀបរាប់ប្រាប់ Sabay ទាំងទឹកមុខក្រៀមក្រំថា “ខ្ញុំស្គាល់នាង៦ខែ និងបានដើរលេងជាមួយគ្នាជាច្រើនកន្លែង ប៉ុន្ដែឥឡូវនាងសុំបែក។ ណាន់ បានចោទជាសំណួរថា ៖”តើខ្ញុំត្រូវធ្វើម៉េចទៅបើនាងចង់បែក ខណៈខ្ញុំកំពុងស្រលាញ់នាងនៅឡើយ?”។

ប្រវត្តិ ស្នេហាអ្នកទាំងពីរ គឺស្គាល់គ្នាតាមរយៈបណ្ដាញសង្គមFacebook។ ណាន់ បានឆាតស្ទើររៀងរាល់ថ្ងៃជាមួយគ្នា។ នៅទីបំផុត អ្នកទាំងពីរបានជួបមុខគ្នា និងបានដើរលេងតាមរមណីយដ្ឋាន និងទៅកន្លែងផ្សេងៗ ជាច្រើនកន្លែងក្នុងអំឡុងពេលស្គាល់គ្នា ប៉ុន្តែនៅមិនទាន់បានឈានដល់ដំណាក់កាលបានខ្លួនបានប្រាណគ្នា នោះទេ។

អនុស្សាវរីយ៍ ដែលស្ទើរតែមិនអាចបំភ្លេច ណាន់បាននិយាយបណ្ដើរ ដោយដៃកាន់រូបថតរវាងណាន់និងសង្សារ ដែលបានថតនៅឆ្នេរសមុទ្រ អូរឈើទាល ខេត្តព្រះសីហនុ ហើយបាននិយាយថា “ខ្ញុំស្គាល់នាងពេលខ្លី តែខ្ញុំហាក់មានអនុស្សាវរីយ៍ជាច្រើន ដូចជា បានដើរលេងនៅខេត្តព្រះសីហនុ ពពែភ្នំ និងរមណីយដ្ឋានគិរីរម្យជាដើម”។

តាំងពីដើមរៀងមក សង្សាររបស់ណាន់មិនដែលបាននិយាយពីប្រវត្តិធ្លាប់មានសង្សារ ហើយណាន់ក៏មិនដែលបានសួរនាងដែរ។

ប៉ុន្ដែ នៅថ្ងៃមួយនាងបានណាត់ណាន់ជួប ហើយនាងបាននិយាយដោយពាក្យលួងលោមផង និងបានសម្ដែងការសោកស្ដាយផង ហើយបាននិយាយដោយខ្លីថា៖ “យើងបែកគ្នាទៅ ព្រោះសង្សារខ្ញុំបានបញ្ចប់ការសិក្សានៅសហរដ្ឋអាមេរិក ហើយបានត្រឡប់មកស្រុកខ្មែរវិញហើយ”។

ពាក្យ ពេចន៍ទាំងនេះបានធ្វើឲ្យណាន់ស្រឡាំងកាំង ប៉ុន្ដែណាន់បានសួរនាងថា ៖”ហេតុអ្វីពីមុនមកអូនមិនប្រាប់បងថា មានសង្សារហើយអីចឹង? ទោះបីជាសំណួរនេះបានចោទសួរទៅនាងក្ដី ប៉ុន្ដែនាងមិនបានឆ្លើយនោះទេ ផ្ទុយទៅវិញនាងបាននិយាយដោយខ្លីថា “រឿងនេះយើងចប់គ្នាទៅ ហើយយើងរាប់គ្នាទុកជាមិត្តធម្មតាបាន បើនិយាយច្រើនទៀតសូម្បីតែមិត្តក៏យើងមិនចាំបាច់រាប់គ្នាដែរ”។

ទាំង នេះជាការរៀបរាប់របស់ណាន់ មកកាន់ Sabay។ នៅទីបំផុតណាន់បានឆ្លើយទៅវិញថា “ណ្ហើយបើអីចឹងចប់ក៏ចប់ចុះ”។ ការឆ្លើយតបរបស់ណាន់បែបនេះគឺផុសចេញទាំងមិនសប្បាយចិត្ត ព្រោះណាន់បាននិយាយថា“ខ្ញុំស្រលាញ់នាងចង់បានជាគូអនាគតមិនមែន ត្រឹមលេងសើចនោះទេ”។

អ្វីដែល ធ្វើឲ្យណាន់មិនអស់ចិត្តមួយទៀតនោះ គឺណាន់នៅមានមន្ទិលសង្ស័យថា តើនាងបែកដោយសារតែនាងមានសង្សារ ឬមួយមកពីមូលហេតុអ្វីផ្សេងៗ។ ទោះបីជាបែបនេះក្ដីណាន់បានអំពាវនាវឲ្យយុវវ័យដែលមានទំនាក់ទំនង ស្នេហា ជាពិសេសអ្នកដែលស្គាល់គ្នា និងស្រលាញ់គ្នាតាមរយៈបណ្ដាញសង្គមFacebook ត្រូវសិក្សាពីប្រវត្តិបុគ្គលម្នាក់ៗឲ្យបានច្បាស់ មុននឹងចាប់ផ្ដើមមានទំនាក់ទំនងស្នេហា ចៀសវាងបង្កើតស្នេហាហើយ បង្កើតការឈឺចាប់។

ណាន់បានស្នើ សុំ Sabay កុំបញ្ចេញឈ្មោះ ឬអត្តសញ្ញាណ របស់សង្សារខ្លួន ព្រោះមិនចង់ឲ្យនាងខឹងសម្បារ ឬប៉ះពាល់ដល់កិត្តិនាមរបស់នាង។ ដូច្នេះហើយ Sabay មិនបានបញ្ចេញឈ្មោះ ឬអត្តសញ្ញាណសង្សាររបស់ណាន់នោះទេ។ ប៉ុន្តែណាន់គ្រាន់តែបាននិយាយថា ប្រសិនបើនាងបានឃើញ រឿងរ៉ាវស្នេហានេះ តាមគេហទំព័រ Sabay នាងនឹងបានដឹងថា “ទោះនាងសុំបែក ក៏ខ្ញុំមិនខឹងនាង ហើយក៏នៅតែស្រលាញ់នាងដដែល”៕

ប្រសិនបើ ប្រិយមិត្ត មានបញ្ហាវិបត្តិស្នេហាស្រដៀងនេះ ឬស្នេហាជោគជ័យ ដែលចង់ចែករំលែកដល់មិត្តអ្នកអានបានជាបទពិសោធន៍ ឬជួយជាយោបល់ក្នុងការដោះស្រាយបញ្ហាក្នុងជីវិត សូមផ្ញើអត្ថបទរឿងរបស់អ្នកមកកាន់ Sabay តាមរយៈmay.soklim@cidc.com.kh ។ ឬអ្នកអាចទូរស័ព្ទមកយើង ០១៦ ៧៩២ ១៥១ ប្រសិនបើអ្នកពិបាកក្នុងការសរសេររៀបរាប់រឿងរបស់ខ្លួន។ Sabay នឹងសរសេរចុះផ្សាយជូន។

Chea Sophanith